80% më pak fluturime dhe 93% më pak pasagjerë në aeroportin e Cyrihut

Gjithsej 201.692 njerëz kanë fluturuar nga ky aeroport ose kanë aterruar në të, gjatë qershorit, që është 93 për qind më pak se në qershorin e një viti më parë

Aeroporti i Cyrihut vazhdon të ndjejë ngërçin e pandemisë së koronavirusit. Edhe pse qershori ka qenë një muaj i ngritjes pas paralizimit pothuaj të plotë, të nisur nga muaji mars, ai nuk ka ndryshuar shumë bilancin e fluturimeve, shkruan albinfo.ch, duke iu referuar mediave zvicerane.

Kështu, gjithsej 201.692 njerëz kanë fluturuar nga ky aeroport ose kanë aterruar në të, gjatë qershorit, që është 93 për qind më pak se në qershorin e një viti më parë.

Megjithatë, kjo shifër tregon një rritje të madhe, prej rreth 460 për qind në krahasim me atë të majit 2020, shkruan srf.ch.

Me fillimin e pushimeve verore, pritet një rritje e mëtejshme e trafikut të udhëtarëve, kanë thënë përgjegjësit e operatorit të aeroportit.

Me 5048 ngritje dhe aterrime, numri i fluturimeve në qershor ishte ende 79.6 për qind nën nivelin e vitit të kaluar, përcjell albinfo.ch. Mesatarisht, 94.1 pasagjerë kanë zënë vend në një aeroplan (-30 për qind) dhe vetëm 57 nga 100 vendet të aeroplanëve kanë qenë të zëna.

I ashtuquajturi “okupimi i ulëseve” një vit më parë ishte për 24  për qind më i lartë.

---