97 % e fëmijëve kanë qasje në internet

Kosova ka popullsinë më të re në Evropë dhe 97 për qind e fëmijëve kanë qasje në internet

Në një hulumtim të bërë nga Qendra për Studime të Avancuara, del se 43 për qind e fëmijëve në Kosovë kanë kontaktuar me persona të panjohur përmes internetit, ka thënë Teuta Zymeri, drejtoreshë e kësaj qendre.

Kosova ka popullsinë më të re në Evropë dhe 97 për qind e fëmijëve kanë qasje në internet.

“Rreth 43 për qind e fëmijëve janë shprehur se kanë kontaktuar me persona të panjohur përmes internetit, dhe 32 për qind e fëmijëve janë shqetësuar pas takimeve që i kanë pasur”, ka thënë Zymeri për “Radion Evropa e Lirë”.

“Ndër rreziqet që janë më të shpeshta dhe i rrezikojnë fëmijët, janë përmbajtjet jo adekuate si pornografia dhe dhuna. Takimi me njerëz të panjohur mbetet si më shqetësuesi, duke mos anashkaluar dhunën kibernetike, varësinë nga interneti etj”, shprehet Zymeri, përcjell albinfo.ch.

Sipas një publikimi nga Organizata e Kombeve të Bashkuar për Mbrojtjen e Fëmijëve (UNICEF) një në tre fëmijë janë përdorues të internetit.

Edhe vetë prindërit janë të shqetësuar me varësinë e internetit te fëmijët e tyre.

Prania tepër e përhapur e pajisjeve dhe telefonave mobil, thekson raporti, e ka bërë qasjen në internet për shumë fëmijë më pak të mbikëqyrur – dhe potencialisht më të rrezikshme.