Gjermania forcon ligjet për dëbimin e të huajve

Gjermania po bën plane për të forcuar ligjet për dëbimin e të huajve, pas valës së sulmeve ndaj qindra grave në Këln dhe qytete të tjera gjermane në prag të Vitit të Ri.

Policia gjermane thotë se sulmet duket të jenë kryer nga grupe të rinjsh emigrantë. 19 të dyshuar janë identifikuar deri tani, që të gjithë emigrantë.

Përkrahësit e së djathtës ekstreme dhe huliganë të futbollit thyen xhamat e dyqaneve dhe dëmtuan makina në qytetin lindor të Lajpcigut para dy ditësh.

Shkatërrimi filloi pothuajse në të njëjtën kohë kur 2 mijë simpatizantë të lëvizjes antiislamike PEGIDA demonstronin aty pranë, duke mbajtur pankarta me slogane si “Liri për Gjermaninë”.

Ministri gjerman i Drejtësisë njoftoi për ligje më të ashpra për deportimin për këdo që shpallet fajtor për disa vepra penale, përfshirë sulmet seksuale.

Policia ka regjistruar mbi 500 kallzime penale nga nata e Vitit të Ri, pothuajse gjysma e të cilave kishte të bënte me sulme seksuale. Analistët thonë se grupet po shfrytëzojnë sulmet për përfitime politike.

Kancelarja gjermane, Angela Merkel, e mbrojti politikën e pranimit të mbi një milion refugjatëve.

Në një valë sulmesh hakmarrëse ndaj të huajve në Këln, u plagosën gjashtë pakistanezë, dy sirianë dhe tre burra nga Guinea.