Austria do t’i ndihmojë Maqedonisë për t’i mbajtur kufijtë e mbyllur

Austria do ta ndihmojë Maqedoninë për t’i mbajtur kufijtë e mbyllur për refugjatët, shkruan shtypi gjerman.

Javën e kaluar Maqedonia mbylli kufirin e saj jugor me Greqinë, ashtu si edhe vendet e të ashtuquajturës „Rrugë e Ballkanit“ dhe më pas edhe kufiri verior me Serbinë mbetet i bllokuar për më shumë se një mijë refugjatë dhe emigrantë.

Njerëzit, të cilët ishin përpjekur për të kaluar kufirin, u detyruan të kthehen përsëri në Greqi, ku rreth 12.000 emigrantë janë penguar nga vazhdimi i udhëtimin në veri të kontinentit evropian.

“Austria ka ofruar ndihmë për Maqedoninë. Ministria e Mbrojtjes aktualisht mund të ndihmojë duke dërguar pajisje teknike, të tilla si syze të posaçme për vëzhgim gjatë natës”, tha për gazetën gjermane „Die Welt“ ministri austriak i Mbrojtjes, Peter Doskozil.

Rruga ballkanike ishte kryesorja nëpërmjet së cilës emigrantët kanë arritur në vendet e pasura në Evropën Perëndimore dhe veriore.

Austria në vitin 2015 ka pranuar më shumë se 90.000 kërkesa për azil. Austria është e dyta pas Suedisë në Evropë. Për këtë vit ka vendosur kufirin vetëm për 37.500 azilkërkues.