BE-ja forcon përpjekjet për të luftuar terrorizmin

Ministrat e drejtësisë dhe të sigurisë të vendeve të Bashkimit Evropian (BE) kanë bërë thirrje të enjten për forcimin e luftës kundër terrorizmit me bashkëpunim të përmirësuar, hetime të zgjeruara të rrjeteve terroriste, regjistrimin e udhëtarëve të trafikut ajror, kontrollin e kufijve të jashtëm, luftën kundër radikalizmit, si dhe luftën kundër financimit të terrorizmit.
Ministrat në një takim urgjent dy ditë pas sulmeve terroriste në Bruksel, ku u vranë 31 persona, në deklaratën e tyre të përbashkët numëruan çdo gjë që duhet të bëhet në nivel të BE-së për të forcuar luftën kundër terrorizmit.

Ministrat theksuan nevojën që urgjentisht të shtohen përpjekjet në hetimin e rrjeteve terroriste përgjegjëse për sulmet në Bruksel dhe Paris, si dhe rrjete të ngjashme.

Ministrat kërkuan nga përgjegjësit e trafikut dhe kompanitë e transportit për të ndarë informacione, në mënyrë që vlerësimet e rrezikut të kryhen në mënyrë efikase dhe për të përshtatur masat për kërcënimet e mundshme në trafik.
Shtetet anëtare kërkuan urgjentisht për të përmirësuar sistemin e furnizimit dhe ndërveprimit të bazave të të dhënave evropiane dhe ndërkombëtare në fushën e sigurisë, të udhëtimit dhe migrimit, duke përdorur teknologji moderne për të mbrojtur privatësinë.

Shtetet anëtare të BE-së duhet të vazhdojnë të zhvillojnë masa efektive për të parandaluar radikalizimin, duke iu kundërvënë retorikës së Daesh (Shtetit Islamik) në strategjinë e komunikimit.

Komisioni Evropian do të shtojë bashkëpunimin me kompanitë e IT për t’iu kundërvënë propagandës terroriste, dhe deri në qershor të këtij viti për të bërë një kod të sjelljes ndaj gjuhës së urrejtjes në internet.