Dick Marty nuk përballet me Parlamentin Evropian

Edhe pse ishte paralajmëruar nga mediat serbe, përballja e parlamentarit zviceran, Dick Marty, me deputetët në Komitetin e Politikës së Jashtme në Parlamentin Evropian lidhur me raportin e tij për Kosovën nuk do të ndodhë as sot e as nesër.

Duke u thirrur në burime nga Parlamentin Evropian, “Koha Ditore” sot shkruan se Marty ka refuzuar kërkesën që të vijë më 17 apo më 18 janar në këtë institucion të BE-së, duke u arsyetuar se “ka agjendën tepër të ngjeshur”. Në vend të kësaj është paralajmëruar që ai të flasë para Komitetit të Parlamentit Evropian në një seancë tjetër në shkurt.

Burime të BE-së kanë thënë se prapa arsyetimeve të Martyt që të mos e pranojë ftesën për debat me parlamentarët evropianë këtë javë qëndron ndoshta edhe përllogaritja e tij që së pari, më 25 janar, të zhvillohet debati në Asamblenë Parlamentare të Këshillit të Evropës, që aty eventualisht ai të marrë mbështetjen për raportin e tij kontradiktor, ku bën akuza për trafikim organesh, e pastaj, kur vjen në Parlamentin Evropian të jetë në pozitë më të fortë me një raport të miratuar në Këshillin e Evropës.

Në Asamblenë e Përgjithshme të Këshillit të Evropës, Dick Marty do ta ketë më të lehtë gjithsesi se sa në Parlamentin Evropian për të fituar mbështetje për akuzat që bën ndaj shoqërisë kosovare, UÇK-së dhe ndaj disa liderëve politikë të tashëm të Kosovës dhe ish-udhëheqësve të UÇK-së.