Mjeku Sonmez thotë se në Prishtinë ka kryer vetëm një transplantim

Mjeku turk Yusuf Sonmez, të cilin prokurorët e EULEX-it në Kosovë e akuzuan se ka luajtur rol kyç në trafikim ilegal me organe më Kosovë, në një intervistë për gazetën Times të Londrës, thotë se nuk ka ditur asgjë për mënyrën se si kanë ardhur ato organe nga dhuruesit.

Mediet turke, shkruan Times, Sonmezin e kanë quajtur “Doktor Frankestein”, por ai hedh poshtë akuzat se në klinikën “Medicus” në Prishtinë, ka bërë transplantimin e veshkave, për të cilat pacientët e rinj kanë paguar edhe deri në 100 mijë euro.

Në të njëjtën kohë ai pohon se në periudhën prej dhjetë muajve, duke filluar nga fundi i vitit 2007, kur ishte në “Medicus”, thotë se si këshilltar dhe kirurg, është kryer vetëm një transplantim, dhe se nuk ka ditur për gjoja trafikimin ilegal.

Sonmez ka thënë se kurrë nuk është takuar me pjesëtarët e UÇK-së, të cilët senatori zviceran Dick Marty i akuzon se kanë vrarë serbët dhe i kanë shitur organet e tyre.

Times shkruan se mjeku Sonmez në Turqi është në zë të keq që nga viti 1998 dhe se disa herë është arrestuar nën dyshimin se ka kryer transplantime ilegale.