LDK-ja e përjashton mundësinë për koalicion me PDK-në

Kryetari i LDK-së, Isa Mutafa, ka thënë se Kosova duhet të përgatitet për zgjedhje të reja, të lira, pas regjistrimit të popullsisë dhe pas ligjit të ri zgjedhor, që do të eliminojnë mundësitë e keqpërdorimit të votës së lirë të qytetarit.

Lidhur me koalicionin e mundshëm të PDK-së, LDK-së dhe AAK-së, Mustafa ka thënë se nuk do të bëjë koalicion as të ngushtë e as të gjerë me PDK-në.  Këto komente Mustafa i bëri mbrëmë gjatë ditës së dytë të fushatës elektorale për rivotimin për zgjedhjet e jashtëzakonshme parlamentare në Mitrovicë,Ndërsa, kryetari i PDK-së dhe kryeministri i në largim, Hashim Thaçi ka ironizuar kërkesën Isa Mustafa për zgjedhje gjatë vjeshtës.

“Jam dakord me Isa Mustafën se zgjedhjet do të mbahen sërish në vjeshtë, por të vitit 2014”, ka thënë Thaçi, ndërsa ka vizituar disa lagje të Mitrovicës. Lideri i PDK-së, partia e të cilit ka fituar numrin më të madh të votave në procesin zgjedhor për Kuvendin e Kosovës, ka thënë se pas rivotimit në Mitrovicë, do të formohet shpejt edhe qeveria e re.

Edhe Lëvizja Vetëvendosje dhe AAK-ja kanë pasur takime me banorët e fshatrave të ndryshme të Mitrovicës në kuadër të zgjedhjeve e jashtëzakonshme parlamentare të ripërsëritura të 12 dhjetorit. Ndërsa drejtues të Frymës së Re (FeR), subjekt politik që nuk e ka kaluar pragun zgjedhor, kanë qëndruar në Mitrovicë, duke kërkuar votën e mitrovicasve në zgjedhjet e së dielës, edhe pse këto vota nuk do të ndikojnë në rezultatin e këtij subjekti politik, që pati fituar 2.2 për qind të votave.