Shqiptarët me qëndrim unik ndaj raportit të Dick Martyt

Delegacioni i Shqipërisë dhe deputetja e BDI-së në Maqedoni, Ermira Mehmeti-Devaja, në sesionin e Asamblesë Parlamentare të Këshillit të Evropës, do të prezantohet me qëndrim unik lidhur me raportin e Dick Martyt. Sipas medieve shqiptare, delegacionin e Shqipërisë do të udhëheq kryeministri Sali Berisha, ndërsa Ministria e Jashtme ka përgatitur një raport prej katër faqesh që do t’ia dorëzojë Këshillit të Evropës, si përgjigje zyrtare e Tiranës ndaj raportit të Martyt.

Ndërkohë Këshillit të Evropës do t’i dorëzohet edhe peticioni, i iniciuar nga shoqatat e dala nga lufta e UÇK-së, të cilët brenda dy javësh mblodhën nënshkrime në Kosovë, Shqipëri, Maqedoni dhe Luginën e Preshevës që kundërshtojnë projekt-raportin e senatorin zviceran. Të mërkurën presidenti i Serbisë, Boris Tadic do t’i drejtohet eurodeputetëve, ndërsa po të njëjtën ditë edhe kryeministri shqiptar, Sali Berisha. Raportuesi Dick Marty, të martën do ta prezantojë raportin e tij, në mbledhjen plenare të Asamblesë Parlamentare të Këshillit të Evropës, e cila fillon të hënën, më 24 janar në Strasburg.

Beogradi në këtë mbledhje do ta përfaqësojë delegacion i Kuvendit të Serbisë në Asamblenë Parlamentare të Këshillit të Evropës, në krye me Dragolub Miçunoviq, ndërsa detyra kryesore e tyre do të jetë zbutja e rezolutës nëpërmjet amendamenteve dhe që të sjellin europarlamentarët që së më shumë sish të votojnë për rezolutën. Pjesëmarrjen e ka paralajmëruar edhe delegacioni i Kuvendit të Kosovës.

Kosova nuk është anëtare e Këshillit të Evropës, por zëvendësministrja e Jashtme e Kosovës, Vlora Çitaku, ka theksuar se “qysh nga viti i kaluar u është lejuar pjesëmarrja në punimet e institucioneve të Këshillit të Evropës kur bëhet fjalë për Kosovën”.