EULEX: Prokurorët kanë nisur hetimet e para

Nëpërmjet një kumtese për media, EULEX-i i është kundërpërgjigjur sot raportuesit të Këshillit të Evropës Dick Marty, që ka thënë se ky mision evropian në Kosovë nuk është i aftë të hetojë trafikimin e organeve njerëzore. EULEX ka thënë se i posedon kapacitetet, ekspertizën, lokacionin dhe juridiksionin për ta bërë shqyrtimin gjyqësor.

Në këtë kumtesë për media, EULEX i bëri thirrje Martyt dhe të gjitha organizatave dhe individëve përkatës që t’i paraqesin të gjitha dëshmitë që i kanë në lidhje me këto akuza të rënda. “Ne jemi gati, të gatshëm dhe në gjendje që ta marrim përsipër këtë përgjegjësi. Si një hap teknik fillestar, prokurorët e EULEX-it i kanë nisur hetimet e para”, thuhet në njoftim.

Po ashtu EULEX-i i bën thirrje të gjitha organizatave dhe individëve përkatës, duke përfshirë Dick Martyn, që t’i paraqesin të gjitha dëshmitë që i kanë në lidhje me këto akuza të rënda.

“Ne i kuptojmë shqetësimet lidhur me mbrojtjen e dëshmitarëve në rajon, por kemi besim të plotë në njësinë tonë për mbrojtjen e dëshmitarëve. Përvoja tashmë ka treguar se ajo është në gjendje që të merret me rastet e profilit të lartë dhe të ndjeshme. Si një mision për sundimin e ligjit, ne punojmë në bazë të fakteve dhe dëshmive. Pa dëshmi nuk mund të bëhet ndjekja penale. Nëse i pranojmë këtë lloj të informatave, prokurorët tanë janë të gatshëm ta nisin punën menjëherë”, thuhet në deklaratë.