Vidhet laptopi në Ambasadën e Kosovës në Berlin

Një laptop i markës IBM është vjedhur në Ambasadën e Kosovës në Berlin. Në të ishin futur të dhënat e kosovarëve që jetojnë në Gjermani, më saktë aplikantët për letërnjoftimet dhe pasaportat kosovare.

Fjala është për pajisjen që Ministria e Brendshme e Kosovës i kishte dërguar edhe në tri konsullata të tjera, Bruksel, Paris dhe në Cyrih nga fundi i nëntorit e deri pak para mbajtjes së zgjedhjeve të 12 dhjetorit, ka raportuar gazeta kosovare “Zëri”.

Lajmi është konfirmuar nga Ministria e Jashtme dhe ajo e Punëve të Brendshme e Kosovës, megjithëse nga të dy ministritë kanë dhënë lajme kontradiktore për ngjarjen.

Ushtruesi i Detyrës së sekretarit permanent në Ministrinë e Jashtme, Fitim Gllareva, thotë se përderisa “në Berlin është bërë vetëm vjedhja e laptopit dhe një kamere të thjeshtë e jo e pajisjeve të tjera, nuk ekziston mundësia teknike e futjes në të dhënat e vendosura në kompjuter e aq më tepër, futja në bazën qendrore të të dhënave që gjendet në Kosovë”.