Të hënën formohet qeveria e re e Kosovës

Thaçi ka thënë se PDK-ja, bashkë me partnerët në koalicion, ka arritur të krijojë një mazhorancë në Kuvend

Në mbledhjen e fundit të Qeverisë në largim, kryeministri Hashim Thaçi bëri të ditur se qeveria e re mund të formohet të hënën, më 21 shkurt, kur do të mbahet mbledhja konstitutive e përbërjes së re të Kuvendit.

Në këtë mbledhje, Thaçi ka falënderuar ministrat për punën e bërë gjatë mandatit tashmë të përmbyllur.

Ndërsa, në cilësinë e mandatarit të ardhshëm, Thaçi ka thënë se PDK-ja, bashkë me partnerët në koalicion, ka arritur të krijojë një mazhorancë në Kuvend, që do të garantojë një qeverisje stabile për mandatin e ardhshëm katërvjeçar.

I bindur se tashmë ka siguruar mbështetjen e Kuvendit për qeverinë e re, Thaçi tha se po i vazhdon edhe konsultimet me Brukselin për përmbushjen e agjendës evropiane, ku ai veçoi liberalizimin e vizave brenda 15 muajve si dhe dialogun me Beogradin.

Thaçi ka thënë se është i bindur që dialogu me Beogradin do të përmbyllet me njohjet reciproke ndërmjet dy shteteve.

Ndryshe, të hënën pritet konstituimi i Kuvendit të ri të Kosovës dhe nëse marrëveshja për koalicion, siç edhe është paralajmëruar, do të nënshkruhet gjatë kësaj jave.