Pas Kosovës, Ahtisaari ndërmjetëson në Belgjikë?

Një ndërmjetësues i huaj do të mund ta ndihmonte Belgjikën që të dalë nga kolapsi politik, ka deklaruar profesori Robert Mnookin i cili është duke udhëhequr projektin “Program on Negociation” në Fakultetin e Drejtësisë në Universitetin Havard.

I pyetur nga e përditshmja belge “L’Echo” se cili është ai person, profesori ka përmendur emrin e ish kryetarit të Finlandës Martti Ahtisaari, duke potencuar se ai i ka ushtruar talentet e tij në rastet me Namibinë dhe Kosovën.

Ndryshe, Belgjika ka thyer rekordin e të gjitha kohërave pa krijuar qeveri, periudhë kjo që numëron 250 ditë dhe si duket nuk është afër ndonjë marrëveshje për një gjë të tillë, në një vend ku janë të instaluar të gjithë institucionet e Bashkimit Evropian.

Deri më tani, rekordin e ka mbajtur Iraku, ku pas 249 ditëve të mospajtimeve mes grupeve myslimane shiite dhe sunite, u arrit marrëveshje për tu krijuar qeveria e re.