Belgjika investon 300 milionë euro në Kosovë?

Përfaqësuesi i firmës Belenergy ka pohuar se për realizimin e këtij projekti kapital ekzistojnë të gjitha garancitë bankare

Kompania Belenergy nga Belgjika do të investojë në komunën e Deçanit rreth 300 milionë euro për ndërtimin e fluturakeve që prodhojnë energji nga era.

Përfaqësuesi i kësaj kompanie për Kosovë, Hajdin Bela ka shpalosur projektin dhe ofertën ditë më parë tek krerët komunalë dhe në prani të ekspertëve lokalë të Deçanit lidhur me realizimin e projekteve për prodhimin e energjisë alternative, paraprakisht të fluturakeve që mundësojnë prodhimin e energjisë elektrike nga era.

“Për shkak të konfiguracionit të tij, Deçani, është shumë atraktiv për realizimin e projekteve të energjisë alternative”, ka thënë Bela.

Përfaqësuesi i firmës Belenergy ka pohuar se për realizimin e këtij projekti kapital ekzistojnë të gjitha garancitë bankare të kompanisë në fjalë për investime deri në 300 milionë euro. Sipas eksperteve belgë, në fazën e parë të projektit brenda disa ditëve do të fillojë puna shkencore e ekspertizës së fizibilitetit, dhe menjëherë do të fillojë edhe puna në ndërtimin dhe ngritjen e 150 fluturakeve, që do të jenë të shpërndara edhe në disa komuna të tjera të Rrafshit të Dukagjinit.

 “Nuk do të ndalemi vetëm me kaq. Në projekt është saktësuar dhe planifikuar jo vetëm prodhimi i energjisë alternative, por do të ngrihet edhe fabrika për prodhimin e stabilimenteve për fluturake me mundësi reale të punësimit të afro 200 punëtorëve”, ka thënë Bela.

Ndërkaq, kryetari i Deçanit, Rasim Selmanaj ka premtuar përkrahjen institucionale dhe gjithçka që është në kuadër të ligjeve për investimet që do t’i bëjë kjo kompani nga Belgjika.