Petriç kundër ndarjes së Kosovës

Duhet të mendohet jashtë kutisë dhe të arrihet një zgjidhje për veriun. Ndryshe ndërtimi i shtetit në Kosovë nuk do të funksionojë

Ish i dërguari i Bashkimit Evropian për Kosovën, Wolfgang Petrich, ka kërkuar ide  më kreative për veriun e Kosovës dhe ka bërë thirrje që Prishtina e Beogradi zyrtar të tërhiqen nga qëndrimet e tyre parimore, për të mundësuar gjetjen e një zgjidhjeje për problemin.

Duke e përjashtuar ndarjen e veriut ai tha se duhet që të arrihet një zgjidhje për veriun përndryshe e gjithë puna në ndërtimin e shtetit në Kosovë nuk do të funksionojë.

“Unë do të favorizoja një përpjekje bashkëpunuese për të parë se për çka kanë nevojë njerëzit, se si mund të ndërlidhen formalitetet që kanë të bëjnë me Prishtinën dhe me nevojat e serbëve të cilat në një mënyrë duhet të ndërlidhen me Beogradin.

Unë nuk e besoj se do të ishte ide e mirë që të jem shumë specifik, por ajo që dua të them është se duhet të mendohet jashtë kutisë dhe të arrihet një zgjidhje për veriun përndryshe e gjithë puna në ndërtimin e shtetit në Kosovë nuk do të funksionojë”, tha Petrich.

Në një bisedë me BBC-në, ambasadori Petrich tha se bisedimet ndërmjet Prishtinës e Beogradit kanë të bëjnë me të ardhmen e rajonit si dhe me bashkëpunimin dhe normalizimin në mes të dyja vendeve.

Duke folur për raportin e të dërguarit të Këshillit të Evropës, Dick Marty, Petrich tha se në rast të mos ndriçimit të plotë të tij ai do të shndërrohet në “njollë” për reputacionin edhe të kryeministrit Thaçi, por edhe të Kosovës.

Kërkesën e faktorit ndërkombëtar për qeverisje me, siç është cilësuar, “duar të pastra në Kosovë” ambasadori Petrich e ka cilësuar si një parim të rëndësishëm për qeverinë e vendit dhe ka shprehur besimin e tij se udhëheqësit politikë në vend do ta respektojnë atë.