Zvicra përgënjeshtron Pacollin të jetë konsull nderi i Liberisë

Kandidati i vetëm për president të Kosovës, Behgjet Pacolli, rezulton të mos jetë konsull nderi i Republikës së Liberisë në Zvicër, siç kishte deklaruar në një intervistë për Express më 2 shtator të vitit të kaluar.

Këtë e ka konfirmuar zyrtari për informim në Ministrinë e Punëve të Jashtme të Zvicrës, Georg Farago. “Zoti Pacolli nuk gjendet në listën e korit konsullor në Zvicër”, ka thënë ai për Kohën Ditore.

“Unë jam konsull nderi i Republikës së Liberisë në Zvicër. Në bazë të këtij statuti diplomatik, unë e kam akreditimin në Kombet e Bashkuara. Unë do të jem atje pasi që nga data 5 shtator e deri në mëngjesin e datës 9 shtator, kam shumë takime me shumë krerë misionesh të shteteve të ndryshme në OKB”, ka thënë Pacolli për Express.

Kryetari i AKR-së, pak ditë para mbajtjes së punimeve të Asamblesë së Përgjithshme të OKB-së, në shtator të vitit të kaluar, pati deklaruar se do të marrë pjesë atje dhe do të lobojë për Kosovën, si konsull nderi i Liberisë në Zvicër.

Por, diplomati zviceran Georg Farago ka thënë se Pacolli nuk është në regjistër të Ministrisë së Punëve të Jashtme të Zvicrës si konsull nderi i asnjë shteti në Zvicër.