Zvicra bllokon mjetet e Gadafit dhe të klanit të tij

Urdhëresa ka hyrë në fuqi ditën e djeshme dhe ka vlefshmëri për tre vjet

Qeveria zvicerane bllokon llogaritë bankare dhe pasuritë e tjera të despotit libian, Gadafi dhe të klanit të tij, të deponuara në këtë vend. Sipas Ministrisë së Jashtme, duke bërë këtë veprim Zvicra dëshiron të pamundësojë përvetësimin e mundshëm të pasurisë shtetërore të Libisë.  Me vendimin e qeverisë është ndaluar po ashtu menjëherë edhe çdo shitje a bartje pronësie mbi patundshmëritë që këta persona kanë në Zvicër.  Urdhëresa ka hyrë në fuqi ditën e djeshme dhe ka vlefshmëri për tre vjet. Veç Gadafit, në këtë listë gjenden edhe 28 persona të tjerë nga rrethi i tij.  Ndërkohë është paraqitur ministri i Jashtëm i Libisë me akuzat ndaj Zvicrës. Sipas tij, kreu i shtetit libian dhe as të tjerët nuk kanë fare llogari bankare apo pasuri të tjera në Zvicër. Për këtë arsye ai ka paralajmëruar se po shqyrtohet mundësia e marrjes së hapave juridikë ndaj Zvicrës për “pohime të paqëndrueshme”.