Në vend të kokainës, shet medikament

Një bandë trafikantësh kosovarë, në tregun e drogës në Winterthur, në vend të kokainës kishte shitur medikamnet “Lidocain”. Të enjten, Gjykata Penale e Cyrihut, njërin nga mashtruesit kosovarë e dënoi me një vit burg me kusht.

Kosovari 25-vjeçar, ishte dënuar qysh në muajin prill të vitit të kaluar nga Gjykata e rrethit në Winerthur, për veprat të ndryshme penale, me 14 muaj burg me kusht dhe 1.000 franga zvicerane.

Ndaj këtij dënimi ai kishte parashtruar ankesë. Mbrojtësi i tij ka kërkuar zëvendësim të dënimit me 90 ditë punë të dobishme shoqërore, me një shumë prej 30 frangash, duke mohuar se bëhet fjalë për mashtrim, pasi konsumuesit me kohë kishin vërejtur se nuk bëhet fjalë për kokainë.

Megjithatë, Gjykata Penale e ka vlerësuar veprën si të dëshmuar, pasi i pandehuri kishte marrë pjesë në mashtrim, me ç‘rast ai kishte siguruar për bandën dhjetë kilogramë “Lidocain”, të cilën ka mundur ta shesë si kokainë në një vlerë prej 400.000 frangave.

Nëpër spitale “Lidocaini” përdoret si mjet për anestezi lokale. Një dozë e gabuar e përdorimit, mund të sjellë deri te infarkti apo edhe shoku.

Kryetari i trupit gjykues Peter Marti, ka pohuar se kosovari 25-vjeçar ka dashur të mashtrojë dhe të pasurohet, duke ia reduktuar dënimin lehtë në 12 muaj me kusht. Në krahasim me Gjykatën e Rrethit, Gjykata Penale ka dëshmuar se i akuzuari ka shkelur Ligjin për prodhime terapeutike.