Evakuohen kosovarë nga Libia

Me ndërmjetësimin e Ministria e Punëve të Jashtme (MPJ) edhe sot ka vazhduar evakuimi i shtetasve të Kosovës që gjenden në Libi.

MPJ-ja njoftoi se evakuimi i shtetasve të interesuar po bëhet përmes aeroplanëve të Turqisë.

Sot kanë arritur në Kosovë shtetasit e evakuuar me ndihmën e autoriteteve të Mbretërisë së Holandës.

Po sot, në aeroportin e Tripolit janë drejtuar përafërsisht 20 shtetas të Kosovës, të cilët pritet të evakuohen përmes aeroplanëve të Turqisë.

MPJ-ja ka falënderuar autoritetet shtetërore të Mbretërisë së Holandës dhe Turqisë për ndihmën e dhënë për evakuimin e shtetasve kosovarë.

Po ashtu MPJ-ja përmes Ambasadës së Kosovës në Ankara është e angazhuar intensivisht për evakuimin e të gjithë shtetasve të interesuar për largim nga zonat e rrezikut.