Prodhuesit vendorë, të diskriminuar

Agim Shahini kryetar i AKB-së tha se në vitin e kaluar më shumë se 2 mijë e 200 biznese janë mbyllur dhe mbi 5 mijë të tjera e kanë shuar aktivitetin e tyre. Ai tha se bizneset vendore janë në situata të palakueshme

Aleanca Kosovare e Bizneseve e konsideron ekonominë e Kosovës në gjendje të mjerueshme, e cila po goditet nga konkurrenca e jashtme, por edhe nga ajo e brendshme. Sipas kësaj aleance, në shumicën e rasteve po krijon pabarazi në treg, ndërsa prodhuesit vendorë “po goditen nga të gjitha anët”.

“AKB-ja, po përpiqemi që t’i artikulojmë kërkesat e bizneseve dhe t’i pasqyrojmë para institucioneve shtetërore të Kosovës për ta përmirësuar mjedisin afarist në vend. Nuk është për t’u mburrur se kemi arritur që të krijojmë një klimë të përshtatshme për zhvillimin ekonomik të Kosovës”, tha Agim Shahini kryetar i AKB-së.

Këto deklarata kanë dalë gjatë Kuvendit të VII- të punës të AKB-së, ku është diskutuar Draft Strategjia e AKB-së 2016-2019, të arriturat dhe aktivitetet për periudhën 2015, raporti financiar si dhe çështjet organizative, ku të gjitha janë miratuar unanimisht nga 128 delegatët.

Sipas Shahinit, në vitin e kaluar më shumë se 2 mijë e 200 biznese janë mbyllur dhe mbi 5 mijë të tjera e kanë shuar aktivitetin e tyre.

“Nuk mund të mburremi me këtë, sepse nga këto kanë mbetur më shumë se 10 mijë të papunë. Nuk mund të mburret as AKB-ja e as institucionet e shtetit që po bëjnë shumë për të luftuar varfërinë në Kosovë e cila po rritet e krahas saj edhe pakënaqësia”, tha kryetari i AKB-së.

Ai shtoi se nga situata jo e mirë, kanë ikur rreth 100 mijë qytetarë të pakënaqur, e tash me lirberalizmin e vizave, ekziston droja e rritjes së ikjes së qytetarëve. Kosova, sipas tij, mund të zhvillohet edhe më shumë dhe për këtë institucionet duhet ndryshuar politikat fiskale pas paraqitjes së problemeve të bizneseve.

“Ne po përpiqemi të punojmë sa më shumë edhe përkundër problemeve dhe sfidave që kemi. Nuk mund ta ndalë askush vizionin e AKB-së, nuk mund ta ndalë askush punën tonë. Për të gjithë AKB-ja është e hapur. Të bashkuar e zhvillojmë Kosovën dhe ecim përpara”, tha kryetari Agim Shahini.