Skip to content

Zvicra ndan 486 milionë franga për transportin hekurudhor të mallrave deri në vitin 2035

@unsplash

Këshilli Federal i Zvicrës synon të forcojë transportin e mallrave përmes Alpeve me hekurudhë, duke propozuar vazhdimin e subvencioneve deri në vitin 2035.

Sipas propozimit të paraqitur në Parlament, Konfederata Zvicerane do të ndajë gjithsej 486 milionë franga për mbështetjen e transportit të kombinuar hekurudhor. Për periudhën 2027–2030, parashihet ndarja e rreth 59 milionë frangave në vit, ndërsa më pas subvencionet do të zvogëlohen gradualisht.

Vendimi vjen pas rënies së pjesëmarrjes së transportit hekurudhor në bartjen e mallrave përmes Alpeve. Në vitin 2025, kjo pjesëmarrje zbriti në 68.6 për qind, kryesisht për shkak të problemeve në linjat hekurudhore veri-jug dhe punimeve infrastrukturore në Gjermani.

Ndërkohë, numri i kamionëve që kalojnë përmes Alpeve ka arritur në 960 mijë udhëtime në vit, dukshëm mbi objektivin zviceran prej 650 mijë kamionësh.

Qeveria synon që masat e reja të hyjnë në fuqi sa më shpejt, mundësisht që nga viti 2027, për të mbështetur dhe stabilizuar transportin e mallrave me hekurudhë.