Gjysma e buxhetit të Kuvendit për rrogat e deputetëve

Deputetët shpenzojnë gjysmën e buxhetit të Kuvendit të Shqipërisë për paga, dieta dhe shërbime, raportoi të martën e përditshmja Panorama. Duke iu referuar relacionit të Kuvendit për realizimin e buxhetit të institucionit për vitin 2010, rezulton se nga fondi prej afërsisht 800 milionë lekësh në dispozicion të Kuvendit, gjysma e tyre ose afërsisht katër milionë dollarë janë përfituar nga deputetët.

Peshën më të madhe specifike e zënë përfitimet që deputetët gëzojnë nga statusi i deputetit dhe ato përbëjnë 47 për qind të totalit të shpenzimeve.“Këtu përfshihen përfitimet financiare për shpenzime telefoni, karburant, qera banese, honorare për pjesëmarrje në komisione, dieta për pjesëmarrje në aktivitete parlamentare si seanca plenare dhe mbledhjet e grupeve parlamentare, etj.”, thuhet në relacionin e Kuvendit.

Sa i takon dietave për udhëtimet jashtë vendit, mësohet se ato zënë 12 për qind, ndërsa shpenzimet për telefoninë fikse dhe celulare zënë rreth 8për qind. Ndërkaq sipas këtij relacioni shpenzimet për paga dhe kontribute janë realizuar në masën 94 për qind, ku 6për qind mosrealizim ka ardhur si rezultat i bojkotit të socialistëve, të cilëve u është bërë ndalesa e pjesshme e pagës për shkak të mospjesëmarrjes në aktivitetet parlamentare.

Shqipëri, gjysma e buxhetit të Kuvendit për rrogat e deputetëveNdërkaq, nga buxheti i shtetit Kuvendit iu akordua një fond prej 142 milionë lekësh të destinuara për investime, nga të cilat peshën kryesore e zinin rikonstruksioni I sallës së seancave plenare dhe i kryesisë së Kuvendit.