Mërgimtari, në plantacion të arrave investon 700 mijë €

Fatos Xhafolli që punon në Gjermani, pa ndihmën e shtetit, ka investuar rreth 700 mijë euro në plantacionin e arrave në rajonin e Gjilanit

Kishte punuar disa vite në Gjermani dhe një pjesë të konsiderueshme të kursimeve kishte vendosur t’i investoj në Kosovës, në sektorin  pemëtarisë. Biznesmeni Fatos Xhafolli, i cili nuk ka marrë subvencion dhe ndihma nga shteti, ka investuar rreth 700 mijë euro në plantacionin e arrave në rajonin e Gjilanit.

Xhafolli ka dy dekada që jeton dhe vepron në Berlin të Gjermanisë, ku në këtë qytet ai ka në pronësi tre restorante, në të cilat ka të punësuar 65 punëtorë.

“Dëshira për atdheun më solli këtu për të investuar në ngritjen e një plantacioni të arrave në rajonin e Gjilanit. Por, deri më tash unë s’kam pasur ndonjë përkrahje institucionale në punën që kam nisur. Tokën e kam blerë prej qytetarëve privatë”,  ka deklaruar për “Zërin” ku investonit i diasporës.

Ai thotë se gjatë procesit të privatizimit ka pasur tokë në shitje, por nuk ka dashur të hyj në këto biznese, për shkak të problemeve të shumta me të cilat janë ballafaquar blerësit tjerë. “Aksioni i fundit i Policisë për lirimin e objekteve të uzurpuara është për t’u përshëndetur”, ka thënë ai.

Po ashtu, biznesmeni Xhafolli thotë se edhe investimet në ngritjen e plantacionit po duhet t’i bëjë të gjitha vetë. “Në kemi kërkuar përkrahje institucionale nga Ministria e Bujqësisë, por deri më tash nuk kemi marrë përgjigje”, tha më tej ky biznesmen që veproi për dekada në mërgim.