Sadiki: „Nuk duam të na trajtojnë të gjithëve si kosovarë të mbeturinave“

Më 28 maj të këtij viti, në Arbon të Thurgau-s, për herë të dytë do të mbahet festa ndërkombëtare kulturore. Qëllimi i saj është që t’i bashkojë kulturat e kombeve të ndryshëm nga rajoni. Në këtë manifestim nuk do të mungojnë folklori shqiptar, peshqë të njelmët portugezë apo edhe valle turke.

Festa ndërkombëtare kulturore e Arbon-it ka për qëllim t’i bashkojë traditat nga e gjithë bota. „Është ky një udhëtim më i lirë nëpër botë“, ka deklaruar Nada Strasser, kryetare e Shoqatës festa ndërkombëtare kulturore e Arbon-it, për të përditshmen zvicerane „Tagblatt“.

Suksesi nga viti i kaluar ka motivuar komitetin organizativ për një përpjekje të dytë, prandaj është paraparë që më 28 maj të mbahet edhe një herë ky manifestim. „Ideja e manifestimit është që t’i njohim qytetarët e Arbon-it me kulturat tona, por edhe për të mos i harruar ato“, ka vazhduar Nada Strasser, e cila edhe vetë është me prejardhje migrante nga Kroacia.

Edhe miqtë e saj nga komiteti organizayiv i festës ndërkombëtare kulturore kanë prejardhje migrante. Islam Sadiki është nga Kosova, Idris Altindas është turk, ndërsa Domingos Pereira, portugez. „Qytetarët e Arbon-it duhet të binden se Portugalia nuk është vetëm Ronaldo dhe futbol“, deklaron Domingos Pereira. Edhe Islam Sadiki ka shprehë shqetësimet e tij. „Nëpër media shpeshëherë shkruhet keq për kosovarët. Ne nuk nuk duam të na trajtojnë të gjithëve si :kosovarë të mbeturinave nga Bürglen-i“, deklaron i mllefosur Islami.

Për këtë vit, në festën kulturore ndërkombëtare janë paraqitur dymbëdhjetë grupe nga dymbëdhjetë vende të ndryshëm të botës: nga Shqipëria, Kosova, Kroacia, Serbia, Portugalia, Turqia, Somalia, Austria, Indonezia, Sri Lanka, Italia dhe Zvicra.

Nga manifestimi i viti të kaluar, komiteti organizativ ka mësuar diçla më tepër. „Ne ishim paksa jo të organizuar mirë, pasi shpeshëherë na është ndalur rryma. Mandej, disa shtete kishin organizuar flamuj më të mëdhenj nëpër stendat e tyre, ndërsa për këtë vit kemi organizuar flamuj të njëtë për të gjithë“, përfundon Islam Sadiki.