Nuk hiqen vizat më 1 korrik për turqit

Ministri turk për Bashkimin Evropian, Jomer Çelik, tha se nuk ka asnjë shans të hiqet regjimi i vizave më 1 korrik për shtetasit turq në vendet e BE-së, shkruan gazeta “Hurriyet Daily News”, përcjell albinfo.ch.

Ministrat e brendshëm të 28 vendeve anëtare në Luksemburg nuk arritën një marrëveshje mbi liberalizimin e regjimit të vizave për Turqinë, Gjeorgjinë, Ukrainën dhe Kosovën.

Ministrat përsëri insistuan që Turqia duhet të ndryshojë legjislacionin antiterror.

Heqja e regjimit të vizave për shtetasit turq nga 1 korriku ishte premtuar në marrëveshjen mes Turqisë dhe BE-së për të parandaluar valën e migrimit që përfshinte dhënien e ndihmës financiare për refugjatët në Turqi dhe përshpejtimin e negociatave për anëtarësim në BE.

Çeliku vuri në dukje se periudha nga 1 korriku nuk është e mundur për të respektuar. ‘Por, ne mendojmë se kjo duhet të ndodhë sa më shpejt që të jetë e mundur’, shtoi ai.

Komisioni Evropian do të paraqesë një raport të ri mbi legjislacionin e Turqisë antiterror më 14 qershor.