Fillojnë ndryshimet në Kushtetutën e Kosovës

Mund të hapet edhe çështja e ndryshimit të nenit të Kushtetutës që përcakton zgjedhjen e presidentit nga zgjedhjet e drejtpërdrejta

Presidenti Behgjet Pacolli ka njoftuar sot se ka filluar procedura e ndryshimit të Kushtetutës së Republikës së Kosovës, në pjesën që ka të bëjë me zgjedhjet.

Pas takimit që pati me kryetaren e Komisionit Qendror të Zgjedhjeve (KQZ), Valdete Daka, Pacolli ka thënë se shumë shpejtë do të fillojë reformimi i sistemit zgjedhor, me ç’rast do të ndryshohet neni kushtetues që e përcakton Kosovën e si një zonë të vetme zgjedhore.

Në bazë të ndryshimeve, pritet që Kosova të ndahet në gjashtë njësi zgjedhore, ndërsa mund të hapet edhe çështja e ndryshimit të nenit të Kushtetutës që përcakton edhe zgjedhjen e presidentit nga zgjedhjet e drejtpërdrejta, ngase kjo është kërkesë e vetë Pacollit dhe të gjitha subjekteve politike.