Në Prishtinë mbahet sot protesta “Jo në emrin tim” kundër aktgjykimit të Speciales

“Liria ka Emër” ka ftuar qytetarët nga të gjitha komunat e Kosovës t’i bashkohen tubimit që nis në orën 16:00 në sheshin “Skënderbeu”

Në Prishtinë sot mbahet protesta e organizuar nga platforma qytetare “Liria ka Emër”, e cila kundërshton aktgjykimin e Dhomave të Specializuara të Kosovës në Hagë ndaj ish-krerëve të Ushtrisë Çlirimtare të Kosovës. Tubimi nis në orën 16:00 në sheshin “Skënderbeu”, nën moton “Jo në emrin tim”, përcjell albinfo.ch.

Organizatorët u kanë bërë thirrje qytetarëve nga të gjitha komunat e Kosovës që t’i bashkohen protestës, ndërsa për pjesëmarrësit është organizuar edhe transport nga qytete të ndryshme të vendit.

Në konferencën për media, përfaqësuesit e platformës kanë deklaruar se qëllimi i tubimit është kërkesa për drejtësi dhe kundërshtimi i aktgjykimit të Speciales. Ismail Tasholli ka thënë se, sipas organizatorëve, aktgjykimi nuk mund të merret në emër të popullit të Kosovës.

“Kosova nuk ka qenë agresori. Shqiptarët e Kosovës kanë qenë viktima të një regjimi që për vite të tëra ua kishte mohuar lirinë, të drejtat dhe dinjitetin”, ka deklaruar Tasholli.

Përfaqësuesit e “Liria ka Emër” kanë lidhur simbolikisht datën e protestës me 1 Tetorin e vitit 1997, kur u zhvillua protesta studentore në Prishtinë. Sipas Tashollit, data është zgjedhur edhe për shkak të rolit që studentët patën në proceset shoqërore dhe politike të asaj periudhe.

Platforma ka njoftuar gjithashtu për organizimin e një proteste në Bruksel më 10 tetor, ndërsa gjatë konferencës u është bërë thirrje Qeverisë dhe Kuvendit që të ndërmarrin hapa lidhur me Projektligjin për ndryshimin dhe plotësimin e Ligjit për Dhomat e Specializuara.

Protesta e sotme është paralajmëruar si tubim qytetar dhe do të zhvillohet në sheshin “Skënderbeu”, në qendër të Prishtinës, duke filluar nga ora 16:00./Albinfo.ch

---