Shtetet e Bashkuara të Amerikës përshëndesin 20 vjetorin e rivendosjes se marrëdhënieve me Shqipërinë

Data 15 mars 2011 ka përkuar me ditën e rivendosjes së marrëdhënieve ndërmjet Sheteve të Bashkuara të Amerikës dhe Shqipërisë. Me rastin e këtij viti jubilarë, sekretarja amerikane e shtetit, Hillari Klinton i ka dërguar një mesazh-urimi popullit shqiptarë, ku ndër te tjera thekson se Shtetet e Bashkuara te Amerikes do te vazhdojnë të jenë një partner konstruktiv i Shqipërisë në rrugën drejt Bashkimit Europian.

“Në emër të Presidentit Obama dhe popullit amerikan, i dërgoj urimet më të mira popullit të Shqipërisë teksa dy popujt tanë shënojnë njëzetë vjet të marrëdhënieve të rivendosura diplomatike më 15 mars. Pas një ndërprerjeje prej 52 vitesh, viti 1991 ishte vërtet një fillim i ri – jo vetëm për marrëdhëniet tona dypalëshe, por edhe për zhvillimin e Shqipërisë si një vend demokratik dhe një partner ndërkombëtar. Kjo ditë përkujton partneritetin tonë, na kujton përparimin e bërë dhe nënvizon premtimin e së ardhmes së Shqipërisë, sidomos ndërkohë që ju ndërmerrni hapat e nevojshëm për të arritur synimin e anëtarësimit në Bashkimin Europian”, thuhet ne mesazhin e dërguar nga Hillari Klinton.

Nga ana tjeter, sekretarja amerikane e shtetit ka përshëndetur edhe përkushtimin dhe kontributet e Shqipërisë në rajon dhe me gjërë, ndërsa i ka bërë thirrje klasës politike që t’i rikthehet dialogut dhe te forcojnë sundimin e ligjit.