EULEX-i, aksion arrestimi për ish-pjesëtarët e UÇK-së

Sipas informatave të fundit, ekziston fletarrestimi edhe për Fatmir Limajn, ish-ministër i Transportit, deputet e nënkryetar i PDK-së

Policia Ekzekutive e EULEX-it ka arrestuar sot tetë persona në kontekst të një hetimi për krime të luftës. Po ashtu janë kryer edhe disa bastisje. Njësia Speciale e Policisë së Kosovës ka bërë sigurinë e gjithëmbarshme të operacioneve.

Një person tjetër është arrestuar në një shtet të huaj. Arrestimet janë kryer me urdhër të gjykatësit të EULEX-it të procedurës paraprake nga Gjykata e Qarkut të Prishtinës, bazuar në dyshimet e bazuara për vrasje, torturime dhe vepra tjera penale të bëra kundër civilëve shqiptarë dhe serb të Kosovës, si dhe ndaj të burgosurve të luftës në qendra të paraburgimit në Kosovë në vitin 1999.

Sipas një kumtese të EULEX-t, hetimet janë duke u kryer nën mbikëqyrjen e një prokurori të EULEX-it nga Prokuroria Speciale e Kosovës (PSRK).

Fillimisht forcat policore të EULEX-it e kishin bastisur shtëpinë e Drejtorit të Policisë Rajonale në Prizren, Nexhmi Krasniqi, por në momentin e arrestimit ka reaguar një grup i vogël qytetarësh, të cilët krijuan barrikada lokale dhe kanë penguar arrestimin e tij. Më vonë Krasniqi është vetëdorëzuar. Ai gjatë kohës së luftës ka qenë pjesëtar i UÇK-së.

Gjatë ditës mediat raportuan për arrestimin e Refki Mazrekut, i njohur me nofkën “Van Dami”, Naser Krasniqit, Behlul Limajt, Naser Shalës, Sabit Shalës, Shaban Shalës, Besim Shurdhajt dhe Osman Hoxhës.

Sipas informatave të fundit, ekziston fletarrestimi edhe për Fatmir Limajn, ish-ministër i Transportit dhe aktualisht deputet e nënkryetar i PDK-së. Sipas fletarrestim, ai është i dyshuar për krime të luftës në Kleçkë.

Agjencia Kosovapress raportoi se urdhër-arresti është lëshuar për 11 ushtarë të Brigadës 121 – “Komandant Kumanova” të UÇK-së.

Ministri i Punëve të Brendshme, Bajram Rexhepi ka thënë se nuk kam informacione se çfarë është duke ndodhur me këto arrestime. 　”Kjo është çështje e EULEX-it dhe e Policisë”, ka thënë ai.

Edhe zëvendëskryeministri Hajredin Kuçi nuk ka dhënë ndonjë qëndrim të Qeverisë, duke thënë se nuk ka ndonjë informacion rreth këtij rasti.