Më shumë se 350 emigrantë shpëtuan në Mesdhe

Të shtunën ekipet e shpëtimit kanë shpëtuar 366 emigrantë, duke u përpjekur për të kaluar Mesdheun. Fatkeqësisht, të paktën 20 prej tyre janë mbytur.

Të mbijetuarit shpëtuan falë katër operacioneve të ndryshme, ishin të mbledhur në tri barka të gomës si dhe në një anije prej druri për peshkim, kanë bërë të ditur të shtunën autoritetet italiane. Të gjithë janë transportuar në portin sicilian Augusta, ku janë marrë në pyetje nga autoritetet italiane.

Një trup i pajetë është gjetur nga ekipet e shpëtimit. Sipas të mbijetuarve, të paktën 20 persona janë mbytur përpara arritjes së ndihmës.

Më shumë se 67. 000 emigrantë kanë mbërritur në Itali në mes të 1 janarit dhe 3 korrikut dhe rreth 2.500 kanë vdekur duke u përpjekur për të kaluar Mesdheun, sipas Organizatës Ndërkombëtare për Migrim.