Promovohen në Gjilan bizneset nga diaspora

Komuna e Gjilanit ka organizuar forumin me temën “Mundësitë për investime në Komunën e Gjilanit” dhe takimin Biznes me Biznes (B2B) në mes bizneseve nga diaspora dhe bizneseve nga Gjilani.

Komuna e Gjilanit ka organizuar forumin me temën “Mundësitë për investime në komunën e Gjilanit” dhe takimin Biznes me Biznes (B2B) në mes të bizneseve nga diaspora dhe bizneseve nga Gjilani.

Siç raportojnë mediat lokale nga ky forum, komuna e Gjilanit ka në botën e jashtme të paktën 32 % të popullatës së saj, kështu që edhe përkushtimi dhe angazhimi i qeverisjes komunale është gjithnjë në funksion të kësaj, duke bërë që muajt e pushimeve të verës të jenë muaj, të cilët do të dominohen nga qytetarët tanë në diasporë.

Ndërsa autoritetet lokale pretendojnë se kanë krijuar lehtësi të shumta dhe njëkohësisht thonë të kenë krijuar ambient të veçantë në aspektin e mbështetjes dhe përkushtimit ndaj kësaj kategorie që mban gjallë zhvillimin ekonomik dhe fuqizimin e afarizmit të vogël, të mesëm dhe atij industrial.

“Komuna ka ulur tarifat deri në pikën zero sa i përket fushës së bizneseve dhe kështu, falë angazhimit të përbashkët, kemi klimë të mirë të mirëbesimit. Ky forum me temën “Mundësitë për investime në komunën e Gjilanit” dhe takimi Biznes me Biznes (B2B) mes bizneseve nga diaspora dhe bizneseve nga komuna e Gjilanit është i mirëseardhur në çdo moment, sepse nevoja për t’u njohur dhe nevoja për të komunikuar gjithnjë është shumë e madhe”, ka thënë kryetari Haziri, transmenton albinfo.ch. Ai ka inkurajuar të gjithë biznesmenët e diasporës që të investojnë në Gjilan, sepse kanë mundësi të shumta dhe kuadro të përgatitura për të gjitha profesionet.

Siç raporton rajonipress, në fjalën e tij në këtë takim, ministri i Diasporës, Valon Murati, ka thënë se diaspora është shtylla kryesore të hyrave të deritanishme në Kosovë. Gjithashtu ka përshëndetur takime të tilla, të cilat janë në funksion të zhvillimit ekonomik dhe krijimit të vendeve të qëndrueshme të punës.

“Ky forum ka për qëllim arritjen e objektivave bazë, si fuqizimin e bashkëpunimit dhe komunikimit me diasporën, promovimin e bizneseve nga diaspora dhe mundësitë e investimeve në komunë për bizneset e diasporës, pastaj krijimin e lidhjeve të qëndrueshme në mes të institucioneve komunale dhe diasporës dhe promovimin e lehtësive, të cilat komuna i ofron për bizneset që operojnë në Gjilan, por edhe promovimin e projekteve ku mund të investohet. Roli dhe rëndësia e mërgatës për investimet në Kosovë është kruciale dhe shumë e nevojshme edhe më tutje, sepse mërgata është ajo që vazhdon të mbështesë Kosovën në të gjitha sferat”, ka thënë në Gjilan ministri Murati.

Në këtë forum, me fjalë përshëndetëse dhe përshkrim të sfidave dhe qëllimeve që kanë janë paraqitur udhëheqës të bizneseve nga Gjilani dhe nga diaspora, duke potencuar entuziazmin e madh për zhvillim ekonomik dhe zhvillim edhe të vendit njëkohësisht.