Cana largohet nga Nantes

33-vjeçari, sipas mediave franceze është zhdukur nga radarët e klubit dhe do të rikthehet vetëm në fundin e kësaj jave, për të diskutuar të ardhmen

Edhe pse nën kontratë deri në qershor të vitit 2017, Lorik Cana duket se e ka vendosur, edhe pse njëanshmërisht, të mos aktivizohet më me Nantes për sezonin që vjen, shkruan albinfo.ch.

33-vjeçari, sipas mediave franceze është zhdukur nga radarët e klubit dhe do të rikthehet vetëm në fundin e kësaj jave, për të diskutuar të ardhmen.

Në profilin zyrtar të “kanarinave” në “Instagram”, para pak ditësh u pa një urim special për ish-kapitenin e kombëtares shqiptare, çfarë tregon se marrëdhënia me ekipin është ende e mirë. Por Loriku, që garanton edhe disa vite në futbollin profesionist, kërkon një kontratë afatgjatë larg Francës.

Edhe vetë presidenti i skuadrës franceze ka konfirmuar se Cana nuk do të jetë më pjesë e Nantes. “Është shumë e thjeshtë. Lorik Cana kërkon të luajë jashtë dhe është në negociata me disa klube. Ai nuk do të kthehet, pasi kërkon një kontratë për tre ose katër sezone. Ne duhet ta mirëkuptojmë Lorikun, pasi kjo mund të jetë negociata e fundit në karrierën e tij. Cana ishte shumë i ndershëm me ne dhe na tha se po kërkon një ekip të ri”, tha presidenti i Nantes, Valdermar Kita.