Rahoveci mirëpret meraklitë e qejfit dhe verës në “Hardhfest”

Me sloganin “Për kokërr t’qefit” më datat 2, 3 dhe 4 shtator Rahoveci do të shënojë dy aktivitete të reja, të cilat sivjet i bashkëngjitën festivalit: Maratona e pijes dhe Karnavali i qytetit

Festivali i vjeljes së rrushit “HardhFest” edhe sivjet ka planifikuar aktivitete të shumta kulturore për nderë të fillimit të fushatës së vjelljes së rrushit në vreshtat e Rahovecit.

Siç bën të ditur komuna e Rahovecit, këtë vit, përveç artistëve vendor, pjesëmarrës do të jenë edhe artistë ndërkombëtarë. Një nga DJ më të famshëm zviceran, si dhe shumë i njohur dhe i dashur për fansat e muzikës elektronike ‘house’, Alex Belluscio, do të performojë në Skenën e Konakut të Rahovecit, aty ku edhe do të mbahet koncerti për 2 net rresht.

Deri më tash është konfirmuar edhe pjesëmarrja e grupit “Elita 5”.

Sipas planeve të organizatorit edhe këtë vit do të ketë vallëzim dhe muzikë tradicionale, pastaj parakalimet e fëmijëve, parakalimet e klubeve sportive,  parakalim dhe demonstrim i mekanizimit bujqësor vreshtar, do të mbahet një panair i produkteve vendore, do të ketë një konferencë ndërkombëtare për rrushin dhe verën, do të organizohet vizitë monumenteve kulturore dhe historike të qytetit të Rahovecit, vizita venarive dhe degustim i verërave, sofra rahoveciane etj.

“Hardhfest” edhe këtë vit mbështetet nga Ministrisë së Bujqësisë, Pylltarisë dhe Zhvillimit Rural dhe Komuna e Rahovecit, ndërsa, partner i festivalit këtë vit do të jetë “StoneCastle”, kompani që feston 10-vjetorin e themelimit.

“Hardhfest” organizohet tash e sa vjet dhe qëllimi i tij është promovimi i prodhimeve vendore dhe nxitja e zhvillimit ekonomik më anë të bujqësisë dhe turizmit rural si dhe pasurimin e ofertës turistike.