Jahjaga do të kandidojë për presidente?

Ajo nuk i ka fshehur ambiciet e saj për të kandiduar për presidente të Kosovës pas ndryshimeve kushtetuese

Ndërkohë, ajo që tash ushtron postin e presidentit të vendit, Atifete Jahjaga, nuk i ka fshehur ambiciet e saj për të kandiduar për presidente të Kosovës pas ndryshimeve kushtetuese, me ç’rast presidenti do të zgjidhet direkt nga qytetarët.

Presidentja Jahjaga në një intervistë dhënë Zërit të Amerikës ka deklaruar se marrëveshja politike, me të cilën u bë edhe zgjedhja e saj në këtë post, ka krijuar qëndrueshmëri politike në vend.

Sa i përket dialogut që po zhvillohet mes Prishtinës dhe Beogradit, presidentja Jahjaga ka shprehur bindjen se Kosova dhe Serbia do të gjejnë zgjidhje evropiane për problemet e interesit të përbashkët, por ka hedhur poshtë çfarëdo mundësie për ndarjen e veriut të Kosovës që, sipas saj, është çështje e brendshme e Kosovës.