Potenciali investues i bizneseve të diasporës në Suedi

Kryetarja Iseni theksoi se do të ishte me shumë interes pjesëmarrja e ministres Bajrami në Forumin Ekonomik që Rrjeti i bizneseve të diasporës planifikon ta organizojë gjatë këtij viti në Suedi

Ministrja kosovare e Tregtisë dhe Industrisë, Hykmete Bajrami, priti në takim kryetaren e Rrjetit të bizneseve të diasporës në Suedi, Saranda Iseni dhe drejtoreshën e Shoqatës Afariste të Gruas “SHE ERA”, znj. Mirlinda Kusari-Purrini.

Në bashkëbisedim me kryetaren Iseni dhe Kusari-Purrini, ministrja Bajrami i informoi ato për mundësitë dhe lehtësitë në fushën e investimeve në Kosovë, si dhe për gatishmërinë e institucioneve që të ofrojnë të gjitha parakushtet e nevojshme për investime të huaja dhe vendëse, thuhet në një njoftim të kësaj ministrie, përcjell albinfo.ch.
Kryetarja Iseni dhe Kusari-Purrini e falënderuan ministren Bajrami për mikpritjen dhe interesimin që të thëllohet bashkëpunimi me diasporën, si dhe të shihet se si mund të vihet në funksion potenciali investues i Rrjetit të bizneseve të diasporës në Suedi.
Kryetarja Iseni theksoi se do të ishte me shumë interes pjesëmarrja e ministres Bajrami në Forumin Ekonomik që Rrjeti i bizneseve të diasporës planifikon ta organizojë gjatë këtij viti në Suedi, ku do të ishte mundësia me e mirë për t’i informuar drejtpërdrejt bizneset e Suedisë lidhur me mundësitë dhe kushtet qe ofron Kosova për investime.
Ministrja Bajrami dhe kryetarja Iseni u dakorduan që puna në lidhje me thellimin e bashkëpunimit të vazhdojë edhe në nivel teknik.