Varroset viktima e tretë e terrorit në Marakesh

Në ceremoninë mortore kanë qenë të pranishëm përfaqësues nga kantoni dhe nga Departamenti i jashtëm ti Qeverisë së Zvicrës

Është varrosur dje në Cadenazzo të kantonit të Tesinës, Christina C., viktima e tretë zvicerane e sulmit terrorist në Marakesh të Marokut. Siç njofton drs.ch., qindra veta kanë marrë pjesë në përcjelljen e fundit të vajzës 25 vjeçare. 

Në ceremoninë mortore të mbajtur në kishën e  Cadenazzos kanë qenë të pranishëm përfaqësues të pushtetit kantonal dhe të Departamentit të jashtëm të Qeverisë së Zvicrës. 

Në meshën që ka mbajtur me këtë rast, Ipeshkvi i Luganos ka dënuar atentatin si një akt çnjerëzor i dhunës. Ai po ashtu është shprehur kundër çdo lloji të fanatizmit, shkruan blick.ch.

Famijen e Kristinës së vrarë në sulmin me bomba që ndodhi para dy javësh në Marok, e ka vizituar për ngushëllime edhe presidentja e vendit, Micheline Calmy-Rey. Ajo po ashtu ka vizituar në spital viktimën tjetër të atentatit, Morenën, e cila ka pësuar plagë të rënda dhe gjendja e të cilës po tregon shenja përmirësimi.