Zvicra “i shpëtoi” valës së refugjatëve nga Afrika Veriore!

Në Zvicër gjatë periudhës së trazirave në shtetet e Afrikës së Veriut numri i refugjatëve është rritur për vetëm 2.5%

Vala e madhe e refugjatëve nga Afrika e Veriut që pritej të kaplonte Zvicrën gjatë muajve të fundit, nuk ka ardhur në përmasat të cilave u frikoheshin përgjegjësit e këtushëm, të fushës së azilit. Kështu, Eduard Gnesa, ambasador i posaçëm për bashkëpunim ndërkombëtar në lëmin e migracionit ka thënë për gazetën “Walliser Boten” se “është shumë e vështirë të gjykohet lidhur me gjendjen. 900 mijë njerëz është pritur të braktisnin Libinë. Prej tyre 2 për qind ose rreth 18.000 kanë ardhur në Evropë. Ndërsa në Zvicër gjatë kësaj kohe numri i refugjatëve është rritur për vetëm 2.5%. Në muajin shkurt, pak pas shpërthimit të trazirave në Tunizi, Egjipt dhe shtete tjera të Afrikës së Veriut, Gnesa e quante “të arsyeshme”  frikën nga një valë e madhe e refugjatëve. Edhe ministrja e drejtësisë ishte shprehur për marrjen e masave për strehimin e valës së refugjatëve që pritej të vinte edhe në Zvicër.