Zvicra kërkon më shumë dhurues gjaku

Për spitalet zvicerane ka rëndësi të posaçme sensibilizimi i njerëzve për të dhënë gjak pikërisht para dhe gjatë pushimeve verore

Për të trajtuar të gjithë të sëmurët që kanë nevojë për gjak, brenda një dite në Zvicër nevojiten 1254 doza të dhuruara gjaku. Për të siguruar një sasi të tillë, Shërbimi i Kryqit të Kuq për dhurim të gjakut – SRK Schweiz AG, në Ditën Ndërkombëtare të Dhuruesve të gjakut (sot, 14 qershor) ka përgatitur n jë sërë aktivitetesh për sensibilizimin e dhuruesve të gjakut.

Të hënën në Gjenevë janë ndriçuar me ngjyrë të kuqe gejzerët e famshëm në liqenin e qytetit, ndërsa sot para ndërtesës së OKB.së, po në Gjenevë, organizohet një aksion i madh për dhurimin e gjakut.

Po ashtu, nga qindra njerëz vullnetarë, do të formohet figura e një pike të madhe gjaku.

Aktivitete të ngjashme do të organizohen edhe në Cyrih, Bernë, St. Gallen etj.

Sipas një komunikate të SRK, Zvicra zotëron me një sasi të mjaftueshme gjaku të dhuruar, sa për të mbuluar nevojat e spitaleve, në përgjithësi gjatë vitit. Mirëpo gjatë pushimeve verore sasitë që mbahen rezervë shpesh herë rrezikohen të shpenzohen.

Prandaj, për spitalet zvicerane ka rëndësi të posaçme sensibilizimi i njerëzve për të dhënë gjak pikërisht para dhe gjatë pushimeve verore.