Gjermania, azil për të përndjekurit e Erdoganit

Autoritetet gjermane kanë thënë se turqit që janë duke u persekutuar nga presidenti Rexhep Tajip Erdogan mund të kërkojnë azil në vend

Ministri gjerman për Evropën, Michael Roth në një intervistë për “Die Welt” tha se “Ministria e Punëve të Jashtme në bashkëpunim është solidarizuar me të gjithë intelektualët kritik në Turqi”, përcjell albinfo.ch.

“Gjermania është një vend i hapur për të gjithë ata që janë përndjekur politikisht”, tha Roth. “Ata mund të kërkojnë azil në Gjermani. Kjo nuk vlen vetëm për gazetarët. ”

Roth ka kritikuar persekutimin nga ana e presidentit turk Rexhep Tajip Erdogan të deputetëve të opozitës, gazetarëve kritikë dhe akademikëve.

“Ajo që po ndodh në Turqi është kundër të kuptuarit tonë të vlerave evropiane, sundimit të ligjit, demokracisë dhe lirisë së mediave”, tha Roth. “Prandaj përgjigja jonë ndaj qeverisë turke ka qenë e qartë: Jo në këtë mënyrë!”

Roth ka shtuar se raporti i BE-së mbi përparimin e Turqisë, i cili duhet të publikohet të mërkurën, do të ketë një përfundim negativ. “Komisioni është shumë i shqetësuar dhe kritik në lidhje me gjërat negative që po ndodhin në Turqi. Për fat të keq, për momentin kjo vlen për shumë gjëra”.