Cyrihu përballet me largimin e kompanive të mëdha

unsplash

Disa kompani të rëndësishme po zhvendosin selitë ose po shkurtojnë vende pune në zonën e Cyrihut, duke ngritur pikëpyetje për atraktivitetin e qytetit si qendër biznesi.

Cyrihu po përballet me një sërë zhvillimesh që kanë rikthyer debatin për konkurrueshmërinë e tij si lokacion biznesi.

Banka Vontobel ka vendosur të largohet nga qyteti i Cyrihut, ndërsa edhe Cembra Money Bank po zhvendos aktivitetet e saj në Baden, në kantonin Aargau. Ndërkohë, Zimmer Biomet po shkurton qindra vende pune në Winterthur, ndërsa Burckhardt Compression planifikon të reduktojë deri në 150 vende pune në lokacionin e saj atje.

Sipas një analize të transmetuesit zviceran SRF, këto raste kanë arsye të ndryshme, ndaj është ende e vështirë të përcaktohet nëse bëhet fjalë për një trend të qëndrueshëm.

Ndër faktorët që ndikojnë në vendimet e kompanive përmenden tatimet, kostoja dhe disponueshmëria e hapësirave të zyrave, pagat, mungesa e punonjësve të kualifikuar, trafiku dhe transporti publik.

Dallimet në tatimin mbi fitimin e kompanive mes komunave mund të jenë të konsiderueshme. Në Baar të kantonit Zug, ku po zhvendoset Vontobel, norma është rreth 12 për qind, ndërsa në qytetin e Cyrihut rreth 19.5 për qind. Në Baden, ku po zhvendoset Cembra, norma është rreth 15 për qind.

Sipas SRF-së, një zhvendosje mund t’u kursejë kompanive dhjetëra milionë franga në vit, ndërsa edhe kostot e qirave dhe infrastrukturës mund të jenë më të ulëta jashtë qytetit.

Megjithatë, ekspertët theksojnë se tatimet zakonisht nuk janë arsyeja e vetme që një kompani largohet. Edhe kostoja e lartë e jetesës, mungesa e hapësirave dhe problemet me trafikun mund të ndikojnë në vendim.

Për qytetin e Cyrihut, largimi i kompanive nënkupton rrezik për humbje të të ardhurave nga taksat dhe vendeve të punës. Një shqetësim tjetër është që kompani të tjera mund të ndjekin të njëjtën rrugë dhe të zhvendosen në kantonet përreth/albinfo.ch/