Sommaruga për izolim të “azilkërkuesve të vështirë”

Për azilkërkuesit "e vështirë" duhet të vendoset një regjim ndalimi i daljes si dhe ndalesë për të shkuar në regjione të caktuara

Ministrja e drejtësisë në Qeverinë e Zvicrës, Simonetta Sommaruga kërkon masa më rigoroze për azilkërkuesit problematikë.

Ajo, në një intervistë që i ka dhënë gazetës “Sonntagsblick” ka thënë se për azilkërkuesit “e vështirë” kantonet duhet të vendosin një regjim ndalimi të daljes si dhe ndalesa për të shkuar në regjione të caktuara.

Ministrja në intervistën e përmendur ka thënë se azilkërkuesit po ashtu duhet të angazhohen në punë me përfitim shoqëror.

Po ashtu ajo ka kërkuar që “personave të vështirë” në vend të parave tu jepen triska (bona) në mënyrë që t`u pamundësohet blerja e alkoolit. Masa e përmendur vjen si përgjigje ndaj ankesave të shtuara për sjelljet e pahijshme të një pjese të refugjatëve të Afrikës së Veriut, të cilët kanë rënë në sy kohëve të fundit.

Nga Afrika e Veriut vijnë pothuaj vetëm meshkuj, që kërkojnë punë, pra bëhet fjalë për njerëz që nuk kanë të drejtë për azil politik. Për këtë arsye, ka thënë Sommaruga, duhet bërë e mundur që kërkesat e tyre për azil të zgjidhen sa më shpejt.