Dogana e Kosovës ka shkatërruar mallra të falsifikuara

Mallrat nga Kina dhe Turqia, kryesisht veshmbathje të markës tregtare Timberland, Tommy Hilfiger, Lacosta dhe Puma

Dogana e Kosovës ka shkatërruar mallra të konfiskuara, për të cilat është konstatuar se shkelin të drejtën e pronësisë. Malli i asgjësuar kap vlerën e 50 mijë eurove dhe shumica e tyre ishin konfiskuar në pikën kufitare të Hanit të Elezit.

Mallrat që u janë nënshtruar procesit të shkatërrimit përbëhen prej 1743 njësi dhe janë me origjinë nga Kina dhe Turqia dhe janë kryesisht veshmbathje të markës tregtare Timberland, Tommy, Hilfiger, Lakosta dhe Puma.

Zyrtarët e Doganës së Kosovës, kanë deklaruar se shkatërrimi i këtyre mallrave ka qenë i detyrueshëm, pasi që është bërë shkelje e të drejtës së pronësisë.

Dogana ka paralajmëruar kompanitë, të cilat importojnë mallra të falsifikuara se këto lloj mallra mund t’i nënshtrohen konfiskimit dhe shkatërrimit nëse vërtetohen se shkelin të drejtën e pronësisë intelektuale.

Po ashtu ka inkurajuar bartësit e së drejtave që të aplikojnë në Doganën e Kosovës për kërkesën për veprim, me qëllim që të mbrohen produktet e tyre.