Vera sjell frikën nga martesat me detyrim?!

"Aktualisht kemi deri nga nëntë kërkesa për këshillim brenda javës, që është dyfishi i numrit të zakonshëm"

Në një artikull të publikuar në gazetën “Der Sonntag” bëhet fjalë për martesat me detyrim, që, sipas gazetës, bëhen më të shpeshta tash, gjatë sezonit të verës. Fjala është për të rinj që jetojnë në Zvicër dhe që janë me prejardhje nga Ballkani, Turqia, Sri Lanka etj.

“Aktualisht kemi deri nga nëntë kërkesa për këshillim brenda javës, që është dyfishi i numrit të zakonshëm”, i ka thënë gazetës një përgjegjës i fushatës zwangsheirat.ch (portali i bërë enkas për denoncimin e martesave me detyrim).

Të rinjtë, meshkuj dhe femra shkojnë për pushime me prindërit e tyre në vendet e prejardhjes dhe shpesh ndodhë që atje të detyrohen të lidhin martesë kundër dëshirës së tyre.

Pas ngurrimit që ka zgjatur me vite, Qeveria e Zvicrës në muajin shkurt ka marrë vendim për të luftuar më ashpër martesat e detyruara. Në deklaratën e saj të dhënë para parlamentit qeveria ka theksuar se zyrtarët e gjendjes civile duhet që para lidhjes së kurorës të sigurohen nga të fejuarit se ata po e bëjnë kurorëzimin me vullnetin e tyre.