Kroacia dhe Kosova, pa çështje të pazgjidhura

Marrëdhëniet dypalëshe të Kosovës dhe Kroacisë janë shumë të mira, miqësore dhe pa çështje të hapura, kanë thënë në Zagreb, zëvendëskryeministri dhe ministri kroat i Punëve të Jashtme, Gordan Jandrokoviq dhe zëvendëskryeministri i Kosovës, Sllobodan Petroviq.

Jandrokoviq ka përshëndetur marrëveshjet e arritura mes Kosovës dhe Serbisë dhe ka përsëritur se Kroacia mbështet fuqishëm integritetin e Kosovës dhe është kundër ndarjes së saj, njofton Ministria e Jashtme kroate. 

Në anën tjetër, zëvendëskryeministri i Kosovës Sllobodan Petroviq ka uruar Kroacinë për përmbylljen e bisedimeve me BE-në dhe ka shfaqur dëshirën që edhe Kosova të në ardhmen të bëhet anëtare e organizatave euro-atlantike.

Një nga temat e takimit ka qenë pozita e kroatëve në Kosovë, për të cilën, shefi i diplomacisë kroate ka shfaqur dëshirën që ky komunitet të gëzojë të drejtat e pakicave, ashtu siç i gëzon pakica shqiptare në Kroaci.