Gjykata vërteton mandatin, Basha kryetar bashkie i Tiranës

Procesi i ankimimit në Kolegjin Zgjedhor të gjykatës ka përfunduar dhe ai mund të nisë detyrën, me konstituimin e këshillit bashkiak　

Gjykata e Tiranës vendosi të miratojë kërkesën e kryetarit te ri të Bashkisë së Tiranës, Lulzim Basha, për vërtetimin e mandatit për Kryetar Bashkie të kryeqytetit.　

Gjykatësja Elbana Lluri deklaroi vendimin lidhur me këtë kërkesë. Sipas procedurës që parashikon ligji për pushtetin lokal, kreu i Bashkisë më të madhe në vend, pajiset me një vërtetim të tillë, që tregon se procesi i ankimimit në Kolegjin Zgjedhor të gjykatës së Apelit ka përfunduar dhe ai mund të nisë detyrën, me konstituimin edhe të këshillit bashkiak.　

Avokatët e Bashës, që depozituan dy ditë më parë kërkesën në gjykatë, i janë referuar Ligjit “për organizimin dhe funksionimin e pushtetit vendor”, në të cilin saktësohet se mandati i kryetarit të Bashkisë apo komunës vërtetohet nga Gjykata.

“Mandati i kryetarit të komunës ose bashkisë vërtetohet nga Gjykata, në juridiksionin e së cilës përfshihet komuna ose bashkia përkatëse, brenda 20 ditëve nga data e shpalljes së rezultatit të zgjedhjes së tij”, thuhet në pikën e parë të nenit 40 të këtij ligji.　

Së bashku me padinë, përfaqësuesit e Bashës kanë dorëzuar në Gjykatë edhe vendimin e fundit të Kolegjit Zgjedhor, vendimin e KQZ-së që shpall kandidatin demokrat fitues me 93 vota më shumë si dhe tabelat për secilën KZAZ të Tiranës me rezultatin përfundimtar për të gjitha qendrat e votimit.