Në fund të vitit 2012 përfundon mbikëqyrja e pavarësisë

Pieter Feith do të jetë zyrtari që do t`ia vërë çelësin zyrës që mbikëqyr pavarësinë e Kosovës.

Burime ndërkombëtare kanë treguar për “Kohën Ditore” detaje të mënyrës së përmbylljes së pavarësisë së Kosovës, për çfarë është rënë dakord në mbledhjen e fundit të Grupit Drejtues Ndërkombëtar.

Grupi i shteteve që e kanë njohur pavarësinë e Kosovës dhe që e mbështesin atë janë marrë vesh që Pieter Feith të mbetet mbikëqyrësi i vetëm i pavarësisë që e ka pasur dhe do ta ketë Kosova.

GDN-j ka rënë dakord, që ICO-ja të mbyllet nga fundi i vitit 2012, me çka do të përmbyllej edhe mbikëqyrja e pavarësisë.

Deri në fund të vitit të ardhshëm, sipas burimeve, shtetet janë marrë vesh që t`i jepet mbështetje e gjithanshme Pieter Feithit dhe zyrës së tij ICO, që të zbatohen edhe pjesët e mbetura të Pakos së Ahtisaarit, që kanë të bëjnë me komunën në veri të Mitrovicës, krijimin e zonave të mbrojtura rreth objekteve të trashëgimisë fetare dhe kulturore, si dhe disa aspekte të të drejtave të komuniteteve.