Zvicër: Bie numri i viktimave në komunikacion

Numri i të vdekurve në aksidentet e trafikut në Zvicër gjatë vitit të kaluar ka qenë 327, ose 6 për qind më pak se një vit më parë

Ka shënuar rënie të theksuar  numri i aksidenteve me fatalitet dhe atyre me të lënduar në Zvicër gjatë vitit të kaluar. Siç bën të ditur Enti Federal për  Statistika në vitin 2010 janë regjistruar më pak se 20 mijë aksidente të tilla, që është numri më i vogël i shënuar që nga vitet e pesëdhjeta të shekullit të kaluar.

Numri i të vdekurve në aksidentet e trafikut në Zvicër gjatë vitit të kaluar ka qenë 327, që është një rënie prej 6 për qind krahasuar me një vit më parë ose 22 jetë të humbura më pak. Po ashtu edhe numri i të lënduarve rëndë, 4458 persona, ka pësuar një rënie prej 5 %, shkruajnë mediet zvicerane.

Gjatë dhjetëvjetëshave të fundit numri i viktimave të komunikacionit  ka shënuar rënie të vazhdueshme. Mjafton të bëhet ky krahasim: Në vitin 1971 në afër 30.000 aksidente të trafikut kanë humbur jetën 1773 veta! Që, krahasuar me vitin 2010 është rreth 6 herë më shumë.

Në kundërshtim me trendin në rënie të aksidenteve të rënda, gjatë vitit 2010 më së keqi e kanë pësuar këmbësorët. Numri i këmbësorëve të lënduar dhe të vdekur gjatë kësaj periudhe ka shënuar një rritje. Lëndime të rënda kanë pësuar 781 persona.