Edhe pak është Gentilini

Brukseli ka dështuar për herë të dytë të emërojë një emisar me mandat të plotë në Kosovë dhe për këtë arsye, Fernando Gentilinit i duhet të qëndrojë edhe dy muaj në Kosovë si përfaqësues special i BE-së.

Për shkak të mospajtimeve mes shteteve anëtare rreth riorganizimit të pranisë europiane në Kosovë dhe nëse emisari i ri do të shërbente edhe si shef i Zyrës Civile Ndërkombëtare, Këshilli i BE-së me rekomandim të kryediplomates Catherine Ashton ishte pajtuar që Gentilinit t’i japin një mandat të përkohshëm deri më 31 korrik.

Në Bruksel kanë shpresuar që gjatë kësaj periudhe do të arrijnë marrëveshje për rigrupimin e strukturave europiane në Kosovë dhe për emisarin me mandat të rregullt.

Megjithëse disa qeveri të shteteve evropiane kanë propozuar emra për postin më të lartë të BE’së në Kosovë, kjo procedurë nuk ka përfunduar.

Këtë javë, Baronesha Ashton do të shpallë vendimin për zgjatjen e mandatit të diplomatit italian deri në fund të shtatorit.  Zyra e Përfaqësuesit të BE’së ka konfirmuar se Gentilini do të vazhdojë misionin në Kosovë.