Pavarësia e institucionit të Avokatit të Popullit po cënohet

Institucioni i Avokatit të Popullit është lënë pas dore për një periudhë të gjatë dhe kjo është kuptuar nga letra që ky institucion i ka drejtuar kuvendit dhe ky i fundit duket se nuk ka ndërmarrë asgjë për problemet me të cilat përballet ky insititucion, është thënë në takimin e Komisionit për Integrime Evropiane të Kuvendit të Republikës së Kosovës me Avokatin e Popullit, Sami Kurteshi.

Në raportin dërguar Kuvendit të Kosovës thuhet se është duke u cenuar pavarësia e institucionit të Avokatit të Popullit.

Gjithashtu në këtë raport shprehet shqetësimi për çështje tjera shumë të ndjeshme siç është edhe mungesa e stafit për të kryer detyrat e institucionit të Avokatit të Popullit.

Vjosa Osmani, anëtare e Komisionit për integrime evropiane në Kuvendin e Kosovës, ka thënë se të gjitha institucionet duhet t’i kushtojnë rëndësi më të madhe problemeve që vijnë nga ana e Avokatit të Popullit.

Ndërsa Avokati i Popullit, Sami Kurteshi, ka thënë se do të vazhdojnë t’i shprehin shqetësimet e tyre edhe më tutje, ndërkohë që bëri të ditur se tashmë ka marrë premtime nga Komisioni për integrime evropiane në Kuvendin e Kosovës, ku shumë shpejt do të merret një iniciativë ligjore për ndryshimin e Ligjit për Avokatin e Popullit.