Vajza vret babanë dhe plagos rëndë nënën

Motivi që Andrina S. ka paraqitur për vrasjen ka qenë fyerja që ka përjetuar me vite nga babai

Një ngjarje e rëndë ka tronditur Zvicrën këtë të martë. Vajza 21 vjeçe ka vrarë me thikë babanë esaj dhe ka plagosur nënën. Kjo ka ndodhur në Beringen të kantonit të Shfahauzenit, në Zvicrën lindore.

Rreth orës 4 të mëngjesit, Andrina, e cila jetonte në banesë të veten, kishte shkuar në shtëpinë e prindërve dhe e kishte therrur në gjumë të atin, 52 vjeçar, me prejardhje nga Austria.

Pasi që nëna kishte provuar t`i vinte në ndihmë të shoqit, ajo e ka sulmuar edhe atë, duke i shkaktuar plagë të rënda.

Pas këtij akti Andrina ka ikur por vetëm pak minuta më vonë është kapur nga policët, të cilët i ka alarmuar vëllai i saj, i cili jeton me prindërit

Gjatë marrjeve të para në pyetje nga policia, ajo ka pranuar vrasjen. Motivi që ka paraqitur ka qenë fyerja që ka përjetuar me vite nga babai. Për këtë arsye ajo kishte vendosur prej kohësh që ta mbyste atë. Ndërsa nëna, meqë nuk e kundërshtonte sjelljen e bashkëshortit ndaj të bijës, ishte po ashtu fajtore, sipas saj.

Ndërkohë mediet e ndryshme spekulojnë se Andrina i përket sektës së satanistëve dhe e shpjegojnë vrasjen me këtë përkatësi të saj.

Ajo, viteve të fundit ka jetuar ndaras nga familja dhe herë pas here ka punuar në CEVI, një organizatë kishtare që organizon kampe të fëmijëve dhe të të rinjve.